Toriteny Mana anio
Mana isan'androALAHADY 21 JONA
SALAMO 119.73-96 F. 6
SAROBIDY NY TENIN’ANDRIAMANITRA
Azo ianteherana (73-80). Ambaran’ny mpanao salamo eto fa Andriamanitra no nahary azy. Fantany tsara hoe iza io Andriamaniny io (73-76). Ka na dia ampandalovin’ny Tompo fahoriana aza izy, dia matoky ihany satria fantany izay inoany (2 Timoty 1.12). Marina ny Teniny (75a), mahatoky ny làlany (75b), azony ianteherana tanteraka Andrianamanitra (78-80). Nahary ahy sy ianao Andriamanitra. Mahalala antsika mihoatra noho ny fahafantarantsika ny tenantsika Izy. Manana hevitra hiheverana antsika Izy (Jeremia 29.11). Safidio ny hifikitra Aminy sy ny Teniny fa tsy ho matiantoka ianao.
Manarina (81-88). Mandalo famoizam-po sy fahakiviana ary fanenjehana indray eto ny mpanao salamo ka mitady fatratra ny Tompo. Mitady fanantenana ao amin’ny Teniny (81), miezaka mitadidy sy mifikitra ary mihazona izany (83, 87-88). Amin’ny ady atrehantsika dia mila mino sy maharitra isika fa hamaly antsika ny Tompo. Ka na dia efa tena mitady ho potika tanteraka mihitsy aza isika (87) dia mila mahatsiaro mandrakariva fa afaka manarina antsika Izy. Mahatoky Izy ary marina ny Teniny.
Nahariana ny zavatra rehetra (89-96). Lazain’ny mpanao salamo indray eto fa ny Tenin’Andriamanitra no fototra maharitra mandrakizay ijoroany (89-90), nahariana izao tontolo izao ary afaka manoro azy ny làlany (91-92). Ka nahatonga azy nilaza fa an’Andriamanitra ny fiainany (94). Noforonin’Andriamanitra ihany koa isika ary Azy izay namorona. Raha hatoky ihany ve, tsy aleo ilay fototra nampisy anao sy izao tontolo izao? Tsy miova ny tenin’Andriamanitra na tamin’ny andron’i Abrahama, na Davida, na Jesoa, na ny Apostoly, na ankehitriny. Tsy manam-petra ny Tenin’Andriamanitra.
Tsianjery: Romana 11.36.
_manaapifin_
Vakiteny
TSY RESAKA VOLO!
Miarahaba antsika rehetra tongasoa eto indray§
Mino aho fa fantantsika rehetra ny tantaran’i Samsona sy Delila. Fantatsika fa hatramin’i Samsona vao teraka dia nolazaina ny ray aman-dreniny fa hitoe-jaza ianao ary hiteraka zazalahy ary tsy hokasian-kareza ny lohany, fa ho nazirita ho an’Andriamanitra ilay zaza hatrany am-bohoka ary izy no hanomboka hamonjy ny Isiraely amin’ny tanan’ny Filistina. (mpitsara 13: 5). Izany no Voady sy fampanantenana natao tamin’ireo ray aman-drenin’i Samsona, ary izany no nahatonga an’i Samsona ho lasa Nazirita rehefa nihalehibe.
Fantantsika fa nitaona azy hanao ratsy i Delila. Te hahafantatra ny tsiambaratelon’ny heriny izy, ary tamin’ny farany dia resy i Samsona ka nilaza taminy hoe: « Raha tapahinao ny voloko, dia hiala amiko ny heriko, ka hanjary ho osa tahaka ny olona rehetra aho. » Noho izany dia notapahin’i Delila ny volony, ary tonga ny Filistina ka nahasambotra azy mora foana.
Ndao ary hazavaina tsara amintsika izany:
– Ny herin’ny Samsona dia tsy tao amin’ny volony, fa ny herin’i Samsona dia tao amin’ny voady amin’ny maha nazirita azy. Ary rehefa tapaka ny volony dia tapaka izany voady izany.
– Toy izany koa eo amin’ny fiainantsika Kristiana, rehefa nateraka indray isika, dia miditra ao anatin’izany fanekena izany, miditra ao anatin’izany voady izany, dia ny fifandraisanao amin’Andriamanitra amin’ny alalan’i Jesosy Kristy. Maro be anefa ireo fankam-panahy eo amin’ny fiainantsika, maro be ihany koa ny fitsapana eo amin’ny fiainantsika ary indraindray isika lavo, manao fahadisoana, manao zavatra tena hanenenana ary mibebaka avy eo. Fantatsika fa Andriamanitra dia mamela heloka antsika. Fa ao anatin’izany zavatra rehetra izany dia miangavy anao mafy aho:
– « tano mafy izany voady izany »
– « tano mafy izany fanekena izany »;
– « Tahirizo ho zava-dehibe ao am-ponao ny fanekena nataon’Andriamanitra taminao »;
– « Omeo lanjany ny fanekena nataonao teo anatrehan’Andriamanitra. »
Ny satana fahavalo dia hanao ny tetika rehetra azony atao mba hanapahana izany voady izany. Hanao izay rehetra azony atao izy hampiena ny lanjan’izany voady izany ao amponao ary tsy hanana hery intsony ianao. Fa rehefa fantatrao fa ny fonao dia an’Andriamanitra, ary fantatrao ny fanoloran-tena anananao ao am-ponao ho Azy; na dia lavo aza ianao sy malemy amin’ny nofo dia te hilaza aminao aho fa izany fo sy fanoloran-tenanao izany no hitondra sy hanohana anao foana hatramin’ny farany.
Vakintsika ao amin’ny hebreo 13: « Aoka tsy ho amin’ny fitiavam-bola ny toe-tsainareo, fa mianìna amin’izay anananareo; fa hoy Izy: «Izaho tsy handao anao mihitsy na hahafoy anao akory»: izany no fanekena ananan’Andriamanitra amintsika amin’ny alalan’i Jesosy Kristy, ary izany no fanekena ananantsika Aminy. Koa mety ho tapaka ny voloko, mety ho voataonan’ny filan’izao tontolo izao aho, mety ho lavo aho, mety hanota, mety hanao zavatra izay tena hanenenako aho ary mibebaka aho avy eo; saingy ao anatin’izany rehetra izany, dia ao anatin’ilay fanekena miaraka amin’Andriamanitra aho, ary izany no hihazona ny foko mandra-pahatongan’ny mandrakizay.
Ny TOMPO anie hanampy antsika.
Andriamanitra hitahy !
Pst Peter Mckenzie
« That’s the way I see it »
CTMI
_vakitenyapifin_
Audio Jona
AUDIO VAKITENY